قبيلة الهونزا من أغرب القبائل علي وجه الارض تتراوح أعمارهم ١٢٠-١٦٠ سنة !

من هي قبيلة الكروراي أكلة لحوم البشر !

في قبيلة اسمها الكروراي، ودي تعتبر اخر قبيلة بدائية في العالم كله لسة عايشة عالكانيبالزم او Cannibalism او اكل لحم نفس الجنس "البشر يعني"، القبيلة دي عايشة في حتة اسمها بوبوا غينيا الجديدة جنب اندونيسيا.

لحد سنة ١٩٧٤م كانوا فاكرين انهم عايشين لوحدهم على كوكب الأرض، يعني الناس اللي مفيش بعدها ناس، وكل البشر الباقيين كانوا بالنسبالهم "ارواح الشياطين"، وعشان كانوا خايفين من الارواح دي بنوا بيوتهم فوق الاشجار "عايشين علي الاشجار فوق زي الحيوانات البرية كدة"، ومقتنعين انهم بيقدروا يرجعوا الموتى بتوعهم بطقوس معينة للخالق اللي هما بيعبدوه متمثلا في طوطم لطيف كدة، والقبيلة زي ما تخيلت بالظبط معندهمش دين سماوي وعايشين عراة تماما وعالصيد.

بالاضافة لصيد الحيوانات فا هما عندهم طقس كدة فيه بيتم التضحية بكائن حي، والكأئن ده اما خنزير بري وقت القحط، واما انسان بيصفوه من دمه وياكلوه علي ايام، وطبعا بعد سنة ١٩٧٤م لما حصل بينهم وبين البشر اول تواصل واتعرفوا، اتحطوا علي خريطة السياحة هناك، والمفروض انهم بطلوا العادة دي وبقوا يقابلوا السياح وبتاع ودخل الدين المسيحي عندهم ، دا المفروض.

لكن المشكلة ان فيه حالات اختفاء كتير جدا بتحصل للاجانب هناك، اي حد في محيط دايرتهم بالليل بيختفي، ولما ييجوا يسألوهم يقولك الشياطين اللي عملت كدة ومش احنا، احنا توبنا وبطلنا وبتاع، والحكومة هناك علي مدار السنين اللي فاتت دي كلها فشلت في اثبات التهمة دي عليهم، على كل حال القبيلة عايشة وموجودة وبتقابل السياح والدنيا جميلة.

لحد يوم ٢٨ فبراير اللي فات ..

اليوم ده، كان فيه مهندس صيني اسمه وو جينج، وده مهندس ومنقب وجي تابع لمجموعة تنقيب عالمية عشان يشرف علي عمال المناجم هناك، اللي بتمر على اراضي القبيلة ومناطق نفوذهم، بس زي ما قلنا القبيلة المفروض بطلت دموية خلاص فالدنيا امان، والمهندس الصيني ده كان يادوب يوميها واصل بقاله ٤ ايام بس، حلو؟

يوم ٢٨ فبراير، اختفى، فص ملح وداب، العمال بلغوا بإختفاؤه للمجموعة وبدورهم بلغوا شرطة بوبوا غينيا الجديدة، اللي فتحت تحقيق مع المحيطين والعمال، واخيرا طالت الشكوك القبيلة اياها، بس زعماء وافراد القبيلة انكروا صلتهم باختفاءه اصلا، وانهم لا شافوه ولا اتعاملوا معاه، واتقفلت القضية ضد مجهول عشان تبدأ اساطير الشياطين تخرج تاني وان الشياطين خطفته ومش عارف ايه، وكانت هتبقا قضية اختفاء غامضة زي اللي بنحكيها ونخاف دي.

المهم، من كام يوم كدة، بدأ افراد القبيلة الذكور يجيلهم حمى، وكحة ناشفة، وصداع، وحرارة مرتفعة واخيرا مضاعفات ضيق تنفس وبقوا يموتوا واحد ورا التاني، كلهم جتلهم الاعراض دي ومات منهم لحد دلوقتي ١٤ واحد، من اصل ١١٨ هما العدد الباقي من القبيلة النهاردة، طبعا لما لقوا نفسهم بيموتوا كدة جريوا علي المسئولين المتعلمين يستنجدوا بيهم، وقالوا في استنجادهم انها "روح الشيطان الاصفر استحوذت علينا".

السلطات هناك اخيرا فهمت، روح الشيطان الاصفر المقصود هو المهندس المختفي نفسه، اللي اخيرا اكتشفوا ان القبيلة دي خطفته وعملت عليه حفلة واكلته، بس لاجل سوء حظهم ان المهندس الصيني كان عنده كورونا، فا كل اللي اتعامل معاه في قيده وسجنه قبل اكله ، وكل اللي داقه او اكله من الذكور اتصاب بالكورونا، ودول بدائيين معزولين معندهمش بجنية مناعة ضد اي فيروس ، فا اتصابوا كلهم.

الاطفال اللي اصغر من ١٢ سنة بس هما اللي نجيوا لانهم مبيشاركوش في الطقوس دي ولا بياكلوا لحم البشر غير بعد البلوغ، وحاليا القبيلة النادرة دي والعرق النادر ده في طريقه للانقراض بعد ما كلهم اتصابوا بفيروس الكورونا خصوصا انهم صعب يروحوا مستشفيات وهما اساسا رافضين تعامل مع البشر، والحكومة هناك ملقتش غير انهم يرمولهم شوية مستلزمات طبية علي امل انهم يستخدموها، واديهم مستنيين.

اهو قبيلة بتنتهي اهيه بردو بسبب الاكل وعادات الاكل، بس بدل ما ياكلوا خفاش ولا قط بري لا دول كلوا بني ادم كامل مصاب بالكورونا اصلا، وكان السبب في اصابتهم وموت اغلبهم بسبب النجاسة دي، واهي الحادثة دي اللي كشفت انهم لسة بيعملوا كدة واحنا في ٢٠٢٠م وانهت اسطورة الاختفاء اللي كانوا بيرموها عالحيوانات البرية والشياطين.